Чек арада жаңжал болуп жатса Ташиев Германияда жатат
«УКМКнын төрагасы Камчыбек Ташиев эмне себептен Баткен облусундагы чек ара жаңжалы болгон жерге бара элек деген суроого» биз азырынча комментарий бере албайбыз», — деп жооп беришти УКМКнын пресс-борборунан.
Алардын айтымында, учурда бул маселе талкууланып жатат. Ал чечилгенден кийин, маалымат коомчулукка жана жалпыга маалымдоо каражаттарына жеткиликтүү болот. УКМКнын төрагасы азыр кайда деген суроого дагы жооп бере алышкан жок.
Белгилей кетсек, Камчыбек Ташиев жүрөгүнө операция жасалып, мурун пландаштырылган медициналык кароодон өтүү үчүн Германияга учуп кеткени жөнүндө маалымат тарап жатат.
Эске салсак, чек ара жаңжалы 28-апрелде тажик тарап Баткен районунун Көк-Таш айылындагы Головной суу бөлүштүрүүчү пунктунун жанындагы электр мамычасына видеокөзөмөлдөөчү камераларын орното баштагандан кийин башталган.
Жергиликтүү тургундар техникаларды алып салууну талап кылышты. Оозеки кагылышуудан кийин тараптар бири-бирине таш ыргыта башташты.
Баткен районунун Көк-Таш айылынын отуз жаштагы тургуну оң көзүнө ок чыгарып, жаракат алды. Анын абалы оор деп бааланууда. Жалпысынан төрт жабырлануучу медициналык жардамга кайрылган.
Белгилей кетүүчү нерсе, Головной суу бөлүштүргүч ишканасы Кыргызстандын аймагындагы Төрткүл суу сактагычын толтурган каналдардын башатында жайгашкан.
17-апрелде бул жерде дагы кичине чыр чыккан. Айылдыктар тазалоо иштерин жүргүзүүнү чечишти, бирок Хожай Ало айылынын тургундары суу алуучу жайга келип, аларды токтотууну талап кылышты, анткени алардын ою боюнча, алар биргелешип жүргүзүлүшү керек. Баткендеги жергиликтүү бийлик ишин токтотуу чечимин кабыл алды.