Эркектин жылаңач сүрөттөрүн интернетке чыгарам деп шантаж кылган аялдар кармалды
Жалал-Абад ОИИБинин кызматкерлери интимдик сүрөттөрү менен шантаж кылган деп шектелген төрт жаранды кармады. Кармалгандардын арасында Сузак районунун жергиликтүү кеңешинин депутаты да бар. Бул тууралуу Жалал-Абад облустук ички иштер башкармалыгынын басма сөз кызматы билдирди.
Алардын айтымында, аларга 31 жаштагы жергиликтүү тургун кайрылып, интимдик сүрөттөрү менен шантаж болуп жатканын айтып арызданган. Анын айтымында, 2022-жылдын декабрь айында ал такси айдоочусу болуп иштеп жүрүп бир аял менен таанышып, аны менен социалдык тармактар аркылуу сүйлөшүп жүргөн.
Аял андан жылаңач, сүрөттөрүн да жөнөтүүнү суранган. Эркек өзүнүн бир нече жылаңач сүрөттөрүн жөнөткөн. Ошондон баштап аял аны шантаж кыла баштаган.
Андан кийин жабырлануучунун айтымында, аял шериги менен андан акча талап кыла баштаган. «Аларды кийим-кече, тиричилик буюмдарын сатып алууга, бардык карыздарын жабууга мажбурлап, коркутуу жолу менен жалпысынан 187 миң сомун алып кетишкен», — деп айтылат милициянын маалыматында.
Укук коргоо органдары «опузалап пара талап кылуу» беренеси боюнча кылмыш ишин козгоду. Бул иш боюнча 4 шектүү кармалган — алардан 15 миң сом, WhatsApp аркылуу тартылган видео, аудио жана тексттик жазуулар алынган.