Мектептерди ачуу маселеси каралып жатат
Саламаттык сактоо министринин орун басары Нурболот Үсөнбаев 3-ноябрдагы брифингде мектептерди экинчи чейректен баштап ачуу тууралуу маалымат берди. Үсөнбаев коронавирус күчөп кетсе мектептерди жабуу чечимин жергиликтүү жетекчилик карашы керек экенин айтты.

«Экинчи чейректен тартып балдарды оффлайн окутуу, мектептерди ачуу боюнча чечим каралып, азыр талкууланып жатат. Мектептерди ачууну 11-ноябрдан тартып баштасакпы деп убактысын карап жатабыз. Кандай режимде, кайсы класстар мектепке барып окуй турганы да сүйлөшүлүүдө. Аймактарда жергиликтүү өз алдынча башкаруу органдары, акимдер, губернаторлор жоопкерчилигин алса, комиссиялары чечим чыгарса, ар бир мектеп өз мүмкүнчүлүгүн карап чыккандан кийин оффлайн режимде окуу башталышы мүмкүн».
Өлкөдө мектептер, жогорку, орто окуу жайлары, бала бакчалар март айынан бери ачыла элек. 1-сентябрда мектепке оффлайн режимге 1-класстын окуучулары гана барган.