Орозайым Нарматованын диплому жокко чыгарылды. Мандатын тапшырабы?
БШКнын 20-январдагы отурумунда комиссиянын жумушчу тобу Билим берүү жана илим министрлигинин 2022-жылдын 15-январында түзүлгөн комиссиясына маалымат берди.
Маалыматка ылайык, депутат Орозайым Нарматованын Жалал-Абад мамлекеттик университетин (ЖАГУ) аяктагандыгы тууралуу диплому мыйзам бузуулар менен берилген.
Мисалы, Нарматованын өздүк делосунда мурунку орто билими тууралуу документ же анын көчүрмөсү жок, окууга кабыл алуу жөнүндө арыз жок, ошондой эле тапшырып жатканда кирүү экзамени тууралуу маалымат жок, окууга өткөндүгү тууралуу маалымат жок. 1-жана 2-курстар үчүн дисциплиналардын жоктугу айтылды.
Депутаттын жардамчысы Мирлан Ураимов Нарматова Москвадагы бизнес колледжин бухгалтердик эсеп боюнча бүтүргөнү тууралуу дипломун ЖАГУ жоготкондугун, анын көчүрмөсү жок экенин билдирди. УКМКнын башкы тергөөчүсү Эдил Алишеровдун айтымында, тергөөдө 9-10-семестрде (5-курс, 2015-2016-жылдары) студент Нарматова өлкөдө жок болуп, экзаменге келбей калган, ошого жараша сынактарга катыша албай калганы аныкталган.
Депутат 5-курстун экзамендерин кантип тапшырды деген суроого жооп берүүдөн баш тартты. Нарматовага мыйзамсыз түрдө диплом берүү фактысы боюнча ЖАГУнун экзамендерин тапшырган профессордук-окутуучулар курамына кылмыш иши козголгон.
2022-жылдын 19-январында ЖАГУнун ректорунун буйругу менен университеттин ички комиссиясынын чечиминин негизинде депутат О. Нарматованын жогорку билими тууралуу диплому жокко чыгарылган (диплом берүү буйругу жокко чыгарылган). БШКнын отурумуна Нарматова өзү катышкан жок. БШКнын жетекчиси Шайлдабекованын айтымында, депутат ооруп жатканына байланыштуу жыйынга катышпай жатат.
БШК атайылап жалган маалымат берген же маалыматты жашыргандыктан, депутаттыкка талапкер Орозайым Нарматованы («Бүтүн Кыргызстан») каттоону жокко чыгарды. Бул тууралуу 20-январда Шайлоо жана референдум өткөрүү боюнча борбордук комиссиясынын отурумунда белгилүү болду.
Ага ылайык, БШК шайлоонун жыйынтыгын аныктоо чечимин жана Нарматованы Жогорку Кеңештин депутаты деп таануу чечимин жокко чыгарды.
БШКнын төрагасы Нуржан Шайлдабекова ошондой эле депутаттыкка талапкер болуп катталып жаткан учурда күчүндө болгон Жоруктар жөнүндө кодекске ылайык, талапкерге атайылап жалган маалымат берүү жана маалыматты жашыруу кылмыш жазасына алып келерин эске салды.
Бул токтомго БШКнын 10 мүчөсү тең добуш берди.