Президент жана депутаттардын айлыгын 5 миң сом кылуу сунушталды
Жогорку Кеңештин депутаты Дастан Бекешев президенттин, премьер-министрдин жана анын кесиптештеринин айлык акыларын жашоо минимумунун деңгээлине чейин төмөндөтүү демилгеси менен чыкты.
Башкача айтканда, 5,5 миң сомго чейин. Бирок Жогорку Кеңеш мыйзам долбоорун кабыл албай жатат. Бул тууралуу ал өзүнүн Telegram каналында жарыялады. Эл өкүлүнүн айтымында, ал мыйзам долбоорун декабрдын башында даярдаган, бирок Жогорку Кеңештин аппараты коомдук талкууга расмий сайтында жарыялабай жатат.
«Мен депутаттардын, премьер-министрдин жана президенттин айлык акыларын жашоо минимумуна чейин кыскартуу боюнча мыйзам долбоорун демилгеледим. Бул калыс болот. Жашоо минимуму кийинүү, тамактануу жана салык төлөө үчүн жетиштүү деп эсептелет. Бул болгону 5 миң сомду түзөт. Менин оюмча, алар муну популизм деп аташат, бирок эгерде өкмөт баарына ушундай минимумду орнотсо, анда бюджетке жооптуу жетекчилер бирдей айлык алышы керек», — деди Дастан Бекешев.