Путин Назарбаевге Кененсары Хандын башын таап берүүгө убада берди
Россиянын Президенти Владимир Путин Казакстандын биринчи Президенти Нурсултан Назарбаевге Кененсары Хандын баш сөөгүн Казакстанга алып келүүгө жардам берем деп сөз берди.
Саясатчылар 30-июнда жолугушкан, бирок Кененсары Хандын башы жөнүндө кечээ, 2-июлда гана белгилүү болду. Нурсултан Назарбаевдин кеңешчиси Айдос Укибаяга шилтеме берүү менен «Казинформ» Нурсултан Назарбаевдин Россия Федерациясына болгон жумушчу сапарынын жүрүшүндө талкууланган маселелердин бири — казак элинин ыйык артефакты болгон Кененсары хандын сөөктөрүн издөө жана Казакстанга кайтаруу болгонун жазды. ⠀
«Сүйлөшүүлөрдүн жүрүшүндө Нурсултан Абишевич Россиянын Президентинен бул процессте көмөк көрсөтүүсүн өтүндү. Элбашы казак эли үчүн акыркы хандын сөөгү өз жеринде жерге берилип, анын жаны жай тапкандыгы өтө маанилүү экендигин баса белгиледи.
Владимир Владимирович Путин Казакстандын биринчи президентин буга орус тарап ар тараптуу жардам көрсөтөт деп ишендирди», — деди Назарбаевдин басма сөз катчысы.⠀
Путиндин айтымында, экспонат табылып, Казакстан элине кайтарылып берилет. Кененсары Касым уулу — 1837-1847-жылдарда Россия империясынан көз карандысыздыкка жетүү үчүн казактардын улуттук-боштондук кыймылынын лидери болгон. ⠀
1847-жылы Кененсары жоокерлери менен Кыргызстанга басып кирип, бирок жеңилүүгө дуушар болгон. Өзү азыркы Чүйдүн аймагында туткунга алынган. Анын кесилген башын кыргыз ханы Ормон Хан, Сибирь генерал-губернатору Горчаковго белек катары салып жиберген. ⠀
Версиялардын бирине ылайык, 1930-жылдарга чейин Кененсарынын баш сөөгү шаардан чыкпай турган, кийинчерээк табышмактуу түрдө жоголуп кеткен.
