Жапаров: «Октябрдан тарта пенсия өлчөмү кыйла көтөрүлөт»
Президент Садыр Жапаров Кыргызстанда 1-октябрдан баштап пенсия көтөрүлө тургандыгын билдирди.
«Урматтуу кыргызстандыктар!
Менин тапшырмам менен өлкөнүн Министрлер Кабинети пенсия өлчөмүн 2022-жылдын 1-октябрынан тартып жогорулатуу чечимин кабыл алды.
Бүгүнкү күндө жалпы өлкө боюнча 735 миңдей пенсионер бар. Аларга пенсия төлөмдөрү үчүн жылына 70 млрд сом каралат. Эми бул максатка биз жыл сайын республикалык бюджеттен 90 млрд сом бөлөбүз.
Буга чейин пенсия өлчөмү орточо 200-300 сомго көтөрүлчү. Азыр эми биз бир эле учурда жалпы өлкө боюнча пенсия өлчөмүн 1700дөн 3400 сомго чейин көтөрүү чечимин кабыл алдык.
Албетте, бул идеалдуу сан эмес.
Бирок бүгүнкү бюджеттин мүмкүнчүлүгүнө жараша жарандарыбыздын жашоо шартын жакшыртуу үчүн бардыгын жасап жатабыз.
Мамлекеттин социалдык саясаты мындан ары да кыргызстандыктардын жашоо сапатын жана бакубатчылыгын жакшыртууга багытталат.» — деп жазган президент.